Skoolwapen

paarl-gimnasium-logoLEUSE:  Die son van geregtigheid bestraal ons.

Gimnasium se skoolwapen is heraldies uniek in die opsig dat die tipiese Franse Fleur de Lis hier hiërogliewies deur die Egiptiese lotusblom of iris voorgestel word. Dit was die simbool van die Farao koningshuis.

"Die son van geregtigheid" wat uit die see opkom, is 'n Christelike religieuse simbool en versinnebeeld Christus wat die Lig van die wêreld is en deur sy Woord die Goddelike geregtigheid uitstraal oor dié wat Hom vrees en sy gebooie onderhou.

Die sirkel rondom "die son van geregtigheid" wat uit die see opkom, word gesimboliseer deur ywerige miskruiers wat in 'n ewigdurende sirkel kruip. Die miskruier is 'n Egiptiese simbool van arbeid, vrugbaarheid en volmaaktheid. Die volgende oes waardeur mens en dier oorleef, word verseker deurdat die miskruier telkens die geleentheid gegun word om sy arbeid voort te sit. So ontstaan 'n ewigdurende oorlewingskringloop wat deur die Epitenare as simbool van volmaaktheid beskou word.

Die purper kleur van Gimnasium se skoolwapen, en oorspronklik ook die kleur van die skoolbaadjies (vandaar die benaming "Bloedworse"), is 'n koningskleur en het religieuse simboliek deurdat die purper ook van toepassing gemaak kan word op Christus.

Die skild is 'n kenteken. Daarop is in die Middeleeue, en waarskynlik ook vroeër, die soldaat se verbintenis aangetoon.

Die banieropskrif slaan terug op die baniere wat tydens seremoniële geleenthede ingespan is om slagspreuke voor te hou.